2027 వరల్డ్ కప్‌పై రోహిత్ శర్మ క్లారిటీ.. ఆడతాడా? లేదా?

2027 వన్డే వరల్డ్ కప్‌లో రోహిత్ శర్మ ఆడతాడా? లేదా? గత కొన్ని నెలలుగా ఈ ప్రశ్నపై క్రికెట్ అభిమానుల్లో ఎన్నో చర్చలు జరుగుతున్నాయి. అయితే ఇప్పుడు ఈ ప్రశ్నకు రోహిత్ శర్మ స్వయంగా ఒక చిన్న సమాధానం ఇచ్చాడు. 2027 వరల్డ్ కప్‌కి ఇంకా చాలా సమయం ఉంది. కానీ రోహిత్ చేసిన ఒక్క కామెంట్ మాత్రం ఇప్పుడు అందరి దృష్టిని ఆకర్షిస్తోంది. ముంబైలో జరిగిన గ్లోబల్ ఫిన్‌టెక్ ఫెస్ట్ కార్యక్రమంలో రోహిత్ పాల్గొన్నాడు. అక్కడ ఒక అభిమాని.. 2027 అక్టోబర్‌లో జరగబోయే వన్డే వరల్డ్ కప్‌లో మీరు ఆడతారా? అని రోహిత్‌ను అడిగాడు.

దానికి రోహిత్ ఇచ్చిన సమాధానం చాలా సింపుల్‌గా ఉంది. “2027 అక్టోబర్ ఇంకా చాలా దూరంలో ఉంది. అప్పటికి ఏం జరుగుతుందో అప్పుడు చూద్దాం” అని రోహిత్ చెప్పాడు. అంతే! రోహిత్ ఒక్క మాటతో తన 2027 వరల్డ్ కప్‌పై ఉన్న సస్పెన్స్‌ను పూర్తిగా తొలగించలేదు. అదే సమయంలో తాను వరల్డ్ కప్ ఆడను అని కూడా చెప్పలేదు. దీంతో రోహిత్ అభిమానుల్లో ఇప్పుడు మరోసారి ఆసక్తి పెరిగింది. అసలు రోహిత్ 2027 వరల్డ్ కప్ వరకు తన వన్డే కెరీర్‌ను కొనసాగిస్తాడా? అనే ప్రశ్న మళ్లీ తెరపైకి వచ్చింది.

ఇక 2027 వన్డే వరల్డ్ కప్‌ను సౌతాఫ్రికా, జింబాబ్వే, నమీబియా కలిసి నిర్వహించనున్నాయి. మరోవైపు.. రోహిత్ ప్రస్తుతం T20, టెస్ట్ ఫార్మాట్లకు దూరంగా ఉన్నాడు. దీంతో అతని కెరీర్‌లో ఇక వన్డే క్రికెట్‌దే కీలక పాత్రగా మారింది. అయితే వన్డేల్లో మాత్రం రోహిత్ ఇంకా తన సత్తా చూపిస్తున్నాడు. ఇంగ్లండ్‌తో జరిగిన తన చివరి వన్డే మ్యాచ్‌లో రోహిత్ ఏకంగా 138 పరుగులు చేశాడు. అంతేకాదు, ఆ ఇన్నింగ్స్‌తో తన బ్యాటింగ్‌పై ఇంకా సందేహాలు అవసరం లేదనే విషయాన్ని చూపించాడు.

ఇదే విషయంపై బీసీసీఐ సెక్రటరీ దేవజిత్ సైకియా కూడా రోహిత్ గురించి కీలక వ్యాఖ్యలు చేశాడు. రోహిత్ అన్ని మ్యాచ్‌ల్లో అద్భుతంగా ఆడుతున్నప్పుడు.. అతని గురించి ఇంత speculation ఎందుకు వస్తోంది? అని ఆయన ప్రశ్నించాడు. రోహిత్ చివరి మ్యాచ్‌లోనే 138 పరుగులు చేశాడని గుర్తు చేశాడు. అంటే ప్రస్తుతం రోహిత్ ఫామ్‌ను చూస్తే.. అతన్ని 2027 వరల్డ్ కప్ చర్చ నుంచి ఇప్పుడే పక్కన పెట్టాల్సిన అవసరం లేదన్నమాట.

అయితే అసలు సమాధానం మాత్రం 2027లోనే తెలుస్తుంది. రోహిత్ “ఆడతాను” అని చెప్పలేదు.. “ఆడను” అని కూడా చెప్పలేదు. “అప్పటికి ఇంకా చాలా సమయం ఉంది.. అప్పుడు చూద్దాం” అనే సమాధానం మాత్రమే ఇచ్చాడు. మరి 2027 వరల్డ్ కప్‌లో రోహిత్ శర్మను మరోసారి టీమిండియా జెర్సీలో చూడగలమా? లేక అప్పటికి అతని కెరీర్ మరో మలుపు తిరుగుతుందా? దీనికి కాలమే సమాధానం చెప్పాలి.