హార్దిక్ పాండ్యా ఎప్పుడు మళ్లీ టీమ్ ఇండియాలోకి వస్తాడు? అసలు అతని comeback పై గౌతమ్ గంభీర్ ఏమన్నాడు? ఇప్పుడు ఇదే విషయము క్రికెట్ వర్గాల్లో హాట్ టాపిక్‌గా మారింది! 2027 వన్డే వరల్డ్ కప్‌కు ఇంకా ఒక సంవత్సరం మాత్రమే ఉంది. దీంతో టీమ్ ఇండియా ఇప్పటి నుంచే వరల్డ్ కప్ కోసం సిద్ధమవుతోంది. ఇందులో భాగంగా వెస్టిండీస్‌తో భారత్ మూడు వన్డేల సిరీస్ ఆడబోతోంది. ఈ సిరీస్ ఆదివారం తిరువనంతపురంలో ప్రారంభం కానుంది. అయితే ఈ సిరీస్‌లో హార్దిక్ పాండ్యా మాత్రం కనిపించడు. మరోసారి గాయం కారణంగా అతను జట్టుకు దూరంగా ఉన్నాడు. 2026 ఐపీఎల్ సీజన్‌లో హార్దిక్ పాండ్యా ముంబై ఇండియన్స్‌కు కెప్టెన్‌గా వ్యవహరించాడు.
అయితే ఆ సమయంలో వెన్ను కండరాల సమస్య కారణంగా నాలుగు మ్యాచ్‌లకు దూరమయ్యాడు. ఆ తర్వాత ఆఫ్ఘనిస్తాన్‌తో జరిగిన భారత హోమ్ వన్డే సిరీస్‌కు కూడా హార్దిక్ ఎంపిక కాలేదు. క్వాడ్రిసెప్స్ గాయం కారణంగా అతను ఆ సిరీస్‌కు దూరమయ్యాడు. అంతేకాదు.. ఆ తర్వాత ఐర్లాండ్, ఇంగ్లండ్ వైట్ బాల్ టూర్‌లకు కూడా హార్దిక్ దూరంగా ఉన్నాడు. ఆసియా గేమ్స్ T20 జట్టులో కూడా అతనికి చోటు దక్కలేదు. ఇలాంటి పరిస్థితుల్లో హార్దిక్ పాండ్యా గురించి టీమ్ ఇండియా హెడ్ కోచ్ గౌతమ్ గంభీర్ కీలక వ్యాఖ్యలు చేశాడు. హార్దిక్ లాంటి ఆటగాడు చాలా అరుదుగా ఉంటాడని గంభీర్ చెప్పాడు.
ఎందుకంటే హార్దిక్ 10 ఓవర్లు బౌలింగ్ చేయడంతో పాటు, నంబర్ 6 లేదా 7లో బ్యాటింగ్ చేసి మ్యాచ్‌ను మార్చగలడు. అయితే.. హార్దిక్ కేవలం వన్డే ఫార్మాట్‌లో ఆడేందుకు నేరుగా రావడం సరిపోదని గంభీర్ స్పష్టం చేశాడు. అతనికి ముందుగా తగినంత మ్యాచ్ ప్రాక్టీస్ కావాలని చెప్పాడు. ఐపీఎల్ తర్వాత హార్దిక్ ఎక్కువగా క్రికెట్ ఆడలేదని గుర్తు చేశాడు. వరల్డ్ కప్‌కు వెళ్లే ముందు హార్దిక్‌కు మంచి గేమ్ టైమ్, మంచి రిథమ్ చాలా అవసరమని గంభీర్ తెలిపాడు. “సగం సిద్ధంగా వరల్డ్ కప్‌కు వెళ్లకూడదు” అంటూ గంభీర్ హెచ్చరించాడు.
అంటే.. హార్దిక్ పూర్తిగా ఫిట్‌గా ఉండటంతో పాటు, వరుసగా మ్యాచ్‌లు ఆడి తన ఫామ్, బౌలింగ్, బ్యాటింగ్‌పై నమ్మకం తెచ్చుకున్న తర్వాతే టీమ్‌లోకి రావాలని గంభీర్ సూచించాడు. ఇక వెస్టిండీస్‌తో అక్టోబర్ 6 నుంచి ప్రారంభమయ్యే T20 సిరీస్‌కు కూడా హార్దిక్ ఎంపిక కాలేదు. అయితే అతని comebackకు సంబంధించి ఒక కీలక అవకాశం కనిపిస్తోంది. అక్టోబర్ 6 నుంచి 11 వరకు పుదుచ్చేరిలో జరిగే ఇండియా A వన్డే సిరీస్‌లో ఆస్ట్రేలియా Aతో హార్దిక్ ఆడే అవకాశం ఉంది. మరి ఈ మ్యాచ్‌లతో హార్దిక్ పూర్తి ఫిట్‌నెస్, ఫామ్ సాధించి టీమ్ ఇండియాలోకి తిరిగి వస్తాడా? 2027 వరల్డ్ కప్‌కు ముందు హార్దిక్ తన స్థానం తిరిగి సంపాదించుకుంటాడా? అనేది ఇప్పుడు ఆసక్తిగా మారింది.
