ఆసియా క్రీడల్లో స్వర్ణం నెగ్గి.. జోరు మీదున్న భారత్ అదే ఊపును విండీస్పైనా కొనసాగించింది. తొలి టీ20 మ్యాచ్ లో కెప్టెన్ శ్రేయస్ అయ్యర్ అద్భుతమైన శతకంతో అదరగొట్టాడు. దీంతో ఐదు టీ20ల సిరీస్లో టీమ్ ఇండియా 1-0 ఆధిక్యంలోకి దూసుకెళ్లింది. రెండో టీ20 మ్యాచ్ రాంచీ వేదికగా శుక్రవారం జరగనుంది.
లఖ్నవూ వేదికగా జరిగిన మొదటి టీ20 మ్యాచ్లో భారత్ 8 వికెట్ల తేడాతో విజయం సాధించింది. తొలుత బ్యాటింగ్ చేసిన విండీస్ 19.1 ఓవర్లలో 171 పరుగులకు ఆలౌటైంది. అనంతరం లక్ష్య ఛేదనలో శ్రేయస్ అయ్యర్ (102*: 43 బంతుల్లో 10 ఫోర్లు, 6 సిక్స్లు) దెబ్బకు వెస్టిండీస్ బౌలర్లు కుదేలయ్యారు. అంతర్జాతీయ టీ20 కెరీర్లో తొలి శతకం ఖాతాలో వేసుకున్నాడు. దీంతో భారత్ కేవలం 14.4 ఓవర్లలోనే 172 పరుగులు చేసి గెలిచింది. శ్రేయస్ తోపాటు (Shreyas Iyer) ఇషాన్ కిషన్ (37*: 27 బంతుల్లో 5 ఫోర్లు), అభిషేక్ శర్మ (21: 10 బంతుల్లో 3 ఫోర్లు, ఒక సిక్స్) రాణించారు. సంజు శాంసన్ (11) నిరాశపరిచాడు. విండీస్ బౌలర్లలో అకీల్, రోస్టన్ చెరో వికెట్ తీశారు.
ఆరంభంలో ఆచితూచి..
విండీస్ నిర్దేశించిన లక్ష్యాన్ని ఛేదించేందుకు దిగిన భారత్కు అభిషేక్ శర్మ (Abhishek Sharma) శుభారంభం ఇచ్చాడు. కానీ, ఓపెనర్లు ఇద్దరూ స్వల్ప వ్యవధిలో పెవిలియన్ కు చేరారు. 35 పరుగులకే రెండు వికెట్లు పడటంతో కెప్టెన్ శ్రేయస్ ఇషాన్ కిషన్ జోడీ ఆరంభంలో ఆచితూచి ఆడారు. కాస్త కుదురుకున్నాక ఎటాకింగ్ కు దిగారు. ఇక ఆఖర్లో శ్రేయస్ విశ్వరూపమే చూపించాడు. సిక్సర్లు బాది స్కోరు బోర్డును పరుగులు పెట్టించాడు. దీంతో మొదట్లో పోటీలో నిలిచినట్లు కనిపించిన విండీస్.. ఒక్కసారిగా వెనుకబడిపోయింది. ఆ జట్టు బౌలర్లకు అవకాశం ఇవ్వకుండా శ్రేయస్ – ఇషాన్ (Ishan Kishan) మ్యాచ్ను ముగించారు. మూడో వికెట్కు వీరిద్దరూ 137 పరుగులు జోడించారు.
ఆ ఇద్దరే రాణించారు..
కెప్టెన్ షై హోప్ (52) తన వన్డే ఫామ్ను కొనసాగిస్తూ చెలరేగాడు. ఓ వైపు కమిల్ పూరన్ (12), షిమ్రోన్ హెట్మయెర్ (5), రోవ్మాన్ పావెల్ (0) వికెట్లు పడినా అతడు మాత్రం పట్టువదల్లేదు. మరో ఎండ్లో షెర్ఫానె రూథర్ ఫోర్డ్ (56) తో కలిసి ఇన్నింగ్స్ను నిలబెట్టాడు. ఈ క్రమంలో ఇద్దరూ హాఫ్ సెంచరీలు సాధించారు. మరోసారి భారత బౌలర్లు విజృంభించి స్వల్ప వ్యవధిలో వికెట్లు తీశారు. కానీ, రూథర్ఫోర్డ్ మాత్రం పోరాడటంతో విండీస్ మెరుగైన స్కోరును చేయగలిగింది. అరంగేట్రం చేసిన నమన్ ధీర్ (3/31) అద్భుతంగా బౌలింగ్ చేశాడు. అతడితోపాటు కుల్స్టాప్ 2, అక్షర్ 2.. మయాంక్, అర్షదీప్ చెరో వికెట్ తీశారు.
