బీహార్‌లో పుట్టాడు.. ఐఐటీ కాన్పూర్‌లో చదువుకున్నాడు.. ఉద్యోగం కోసం జపాన్ వెళ్లాడు. కానీ క్రికెట్‌పై ఉన్న ప్రేమను మాత్రం వదల్లేదు. చివరికి జపాన్ జాతీయ క్రికెట్ టీమ్‌లో చోటు సంపాదించాడు. ఇప్పుడు ఈ బీహార్‌కు చెందిన క్రికెటర్ అభిషేక్ ఆనంద్ పేరు సోషల్ మీడియాలో వైరల్ అవుతోంది. అసలు అభిషేక్ ఆనంద్ ఎవరు? ఆయన జపాన్ క్రికెట్ టీమ్‌లోకి ఎలా వచ్చారు? ఇప్పుడు ఎందుకు ఇంత వైరల్ అవుతున్నారు? తెలుసుకుందాం. బీహార్‌లోని రోహ్తాస్ జిల్లాకు చెందిన 28 ఏళ్ల అభిషేక్ ఆనంద్.. ఐఐటీ కాన్పూర్‌లో కెమిస్ట్రీలో మాస్టర్స్ డిగ్రీ పూర్తి చేశారు. కాలేజ్‌లో చదువుకునే సమయంలోనే క్రికెట్‌పై ఆయనకు ఎంతో ఆసక్తి ఉండేది.
ఐఐటీ కాన్పూర్ క్రికెట్ టీమ్‌కు కెప్టెన్‌గా కూడా వ్యవహరించారు. చదువు పూర్తయిన తర్వాత ఉద్యోగం కోసం జపాన్‌లోని టోక్యోకు వెళ్లారు. అక్కడ ఉద్యోగం చేస్తూనే క్రికెట్‌ను కొనసాగించారు. జపాన్‌లో క్లబ్ క్రికెట్ ఆడుతూ తన ఆటను కొనసాగించారు. అక్కడి లోకల్ క్రికెట్‌లో మంచి ప్రదర్శన ఇవ్వడంతో అభిషేక్‌కు జపాన్ జాతీయ జట్టులో అవకాశం వచ్చింది. 2025 మే 9న కుక్ ఐలాండ్స్‌తో జరిగిన మ్యాచ్‌లో T20 ఇంటర్నేషనల్ క్రికెట్‌లోకి అరంగేట్రం చేశారు. ఇప్పటివరకు అభిషేక్ 18 T20 ఇంటర్నేషనల్ మ్యాచ్‌లు ఆడారు. ఇందులో 275 పరుగులు చేశారు. అత్యధిక స్కోర్ 55 పరుగులు. అలాగే ఒక వికెట్ కూడా తీసుకున్నారు.
అయితే ఇప్పుడు అభిషేక్ పేరు సోషల్ మీడియాలో మరింత వైరల్ కావడానికి మరో కారణం ఉంది. భారత్‌తో జపాన్ ఆడబోయే చారిత్రాత్మక T20 మ్యాచ్‌కు ముందు అభిషేక్‌కు సంబంధించిన ఓ వీడియో సోషల్ మీడియాలో వైరల్‌గా మారింది. ఆ వీడియోలో.. జపాన్ తరఫున ఆడుతున్న బీహారీగా ఎలా అనిపిస్తోంది అని అడిగారు. దానికి అభిషేక్ ఇచ్చిన సమాధానం క్రికెట్ అభిమానులను ఆకట్టుకుంది. ముఖ్యంగా “Bihari kahan nahi hai bhai” అనే మాట సోషల్ మీడియాలో బాగా వైరల్ అవుతోంది. అయితే ఇక్కడ ఒక ముఖ్యమైన విషయము ఉంది. సెప్టెంబర్ 22న భారత్‌తో జరిగే మ్యాచ్‌కు అభిషేక్ ఆనంద్ ఆడటం ఇంకా ఖరారు కాలేదు.
జపాన్ ప్రకటించిన 15 మంది సభ్యుల జట్టులో అభిషేక్ పేరు లేదు. ఇక భారత్, జపాన్ మధ్య ఈ మ్యాచ్ సెప్టెంబర్ 22న జపాన్‌లోని తోచిగి ప్రాంతంలోని సానో ఇంటర్నేషనల్ క్రికెట్ గ్రౌండ్‌లో జరగనుంది. ఇది రెండు దేశాల పురుషుల క్రికెట్ జట్ల మధ్య జరగబోయే తొలి అంతర్జాతీయ మ్యాచ్. భారత్, జపాన్ దౌత్య సంబంధాలకు 75 సంవత్సరాలు పూర్తైన సందర్భంగా ఈ మ్యాచ్‌ను నిర్వహిస్తున్నారు. ఐఐటీ కాన్పూర్‌లో చదివి.. ఉద్యోగం కోసం జపాన్ వెళ్లి.. అక్కడ కూడా క్రికెట్‌ను కొనసాగిస్తూ జాతీయ జట్టులోకి వచ్చిన అభిషేక్ ఆనంద్ ప్రయాణం ఇప్పుడు క్రికెట్ అభిమానుల దృష్టిని ఆకర్షిస్తోంది.
