చెన్నై సూపర్ కింగ్స్‌లో ఇప్పుడు ఒక కీలక మార్పు జరిగింది. IPL లో ఎన్నో ఏళ్లుగా కొనసాగిన విదేశీ కోచ్ స్థానంలో.. తొలిసారి ఒక భారతీయుడికి హెడ్ కోచ్ బాధ్యతలు అప్పగించారు. ఆ భారతీయుడు ఎవరో కాదు.. టీమిండియా మాజీ స్టార్ పేసర్ జహీర్ ఖాన్. CSK హెడ్ కోచ్‌గా జహీర్ ఖాన్‌ను నియమిస్తున్నట్లు ఫ్రాంచైజీ అధికారికంగా ప్రకటించింది. అయితే.. జహీర్ నియామకంపై ఇప్పుడు ఒక ఆసక్తికరమైన చర్చ మొదలైంది. మాజీ భారత క్రికెటర్ సదగోపన్ రమేష్.. జహీర్ నియామకంపై స్పందిస్తూ కొన్ని కీలక వ్యాఖ్యలు చేశారు. జహీర్ ఒక గొప్ప క్రికెటర్ అని.. అద్భుతమైన బౌలర్ అని రమేష్ ప్రశంసించారు.
కానీ హెడ్ కోచ్‌గా జహీర్‌కు ఇదే మొదటి పెద్ద అవకాశం అని గుర్తు చేశారు. జహీర్ గతంలో ఒక IPL ఫ్రాంచైజీలో క్రికెట్ ఆపరేషన్స్‌కు సంబంధించిన బాధ్యతలు నిర్వహించారు. ఆ తర్వాత మరో జట్టుతో మెంటర్‌గా కూడా పనిచేశారు. కానీ.. ఇప్పటివరకు IPL జట్టుకు పూర్తిస్థాయి హెడ్ కోచ్‌గా మాత్రం పనిచేయలేదు. అందుకే జహీర్ విజయంపై వేచి చూడాల్సిందేనని రమేష్ అన్నారు. ఇక్కడే మరో ఆసక్తికరమైన విషయాన్ని కూడా ఆయన ప్రస్తావించారు. గుజరాత్ టైటాన్స్‌తో ఆశిష్ నెహ్రా సాధించిన విజయాన్ని CSK గమనించి ఉండొచ్చని రమేష్ అభిప్రాయపడ్డారు. ఆ జట్టు IPL లోకి వచ్చిన మొదటి సీజన్‌లోనే టైటిల్ సాధించింది.
ఆ తర్వాత కూడా ప్లేఆఫ్స్‌కు చేరుతూ మంచి ఫలితాలు సాధించింది. అందుకే.. నెహ్రా మోడల్‌ను చూసి CSK కూడా ఇలాంటి ప్రయోగం చేయాలని భావించి ఉండొచ్చని రమేష్ చెప్పారు. ఇప్పటివరకు CSK కు విదేశీ కోచ్‌లే ఎక్కువగా ఉండగా.. ఇప్పుడు తొలిసారి ఒక భారతీయుడిని హెడ్ కోచ్‌గా తీసుకుంది. దీంతో జహీర్ రాకతో CSK లో కొత్త మార్పు వస్తుందా? జట్టు గత ఫలితాలను మార్చి మళ్లీ బలంగా తిరిగి వస్తుందా? అనే ఆసక్తి అభిమానుల్లో మొదలైంది. మరోవైపు.. CSK హెడ్ కోచ్‌గా అవకాశం రావడం తనకు గౌరవంగా ఉందని జహీర్ ఖాన్ చెప్పారు.
CSK పై తనకు ఎప్పటి నుంచో ప్రత్యేకమైన అనుభూతి ఉందని.. మైదానంలో ఈ జట్టుతో ఆడిన పోటీలు ఎప్పుడూ ప్రత్యేకంగానే ఉండేవని తెలిపారు. చెపాక్‌ లో CSK అభిమానులు సృష్టించే వాతావరణం మరింత ప్రత్యేకమని జహీర్ అన్నారు. ఇప్పుడు జహీర్ ముందున్న అసలు సవాలు మాత్రం కోచ్‌గా తనను తాను నిరూపించుకోవడం. ఒక స్టార్ బౌలర్‌గా ఇప్పటికే తనకంటూ ప్రత్యేక గుర్తింపు తెచ్చుకున్న జహీర్.. ఇప్పుడు కోచ్‌గా CSK ను ఎంతవరకు విజయాల వైపు తీసుకెళ్తారనేది చూడాలి. జహీర్ నియామకంపై రమేష్ చేసిన ఈ వ్యాఖ్యలు ఇప్పుడు క్రికెట్ వర్గాల్లో ఆసక్తిని పెంచుతున్నాయి.
