క్రికెట్ అభిమానులకు ఇప్పుడు ఒక పెద్ద ప్రశ్న.. రోహిత్ శర్మ వచ్చే ఏడాది జరిగే వన్డే ప్రపంచకప్‌లో ఆడతాడా? లేదా? అనే చర్చ మళ్లీ మొదలైంది. అయితే తాజాగా ఈ విషయంలో ఒక కీలక పరిణామం కనిపిస్తోంది. రోహిత్‌కు వన్డేల్లో కొనసాగేందుకు లైన్ క్లియర్ అయినట్టే కనిపిస్తున్నా.. బీసీసీఐ మాత్రం ఇంకా ఒక విషయంలో ఆలోచనలో ఉన్నట్లు తెలుస్తోంది. అదే రోహిత్ ఫిట్‌నెస్! ఇంతకీ అసలు విషయము ఏంటంటే.. గతంలో అజిత్ అగార్కర్ నేతృత్వంలోని సెలక్షన్ కమిటీ రోహిత్‌ను వన్డేల్లో కొనసాగించడంపై పెద్దగా ఆసక్తి చూపలేదనే వార్తలు వచ్చాయి.
వచ్చే ప్రపంచకప్ కోసం రోహిత్ స్థానంలో యశస్వి జైస్వాల్‌ను తీసుకోవాలని కూడా ఆ కమిటీ భావించినట్లు సమాచారం. కానీ బీసీసీఐ మాత్రం దీనికి పూర్తిగా అంగీకరించలేదు. అందుకే వెస్టిండీస్‌తో జరగబోయే వన్డే సిరీస్‌కు రోహిత్‌ను ఎంపిక చేసినట్లు తెలుస్తోంది. మరోవైపు రిటైర్మెంట్‌పై వార్తలు వస్తున్న సమయంలో.. రోహిత్ తన బ్యాట్‌తోనే సమాధానం ఇచ్చాడు. లార్డ్స్‌లో ఏకంగా 138 పరుగుల అద్భుత ఇన్నింగ్స్ ఆడాడు. దీంతో రోహిత్‌ను ప్రపంచకప్ వరకు కొనసాగించాలనే ఆలోచన బీసీసీఐలో బలపడినట్లు సమాచారం.
అయితే ఇక్కడే అసలు ట్విస్ట్ ఉంది. రోహిత్ వయసు ఇప్పుడు 39 ఏళ్లు. గత ఐపీఎల్ సీజన్‌లో గాయం కారణంగా వరుసగా నాలుగు మ్యాచ్‌లకు దూరమయ్యాడు. దీంతో ప్రపంచకప్ సమయానికి అతను పూర్తి ఫిట్‌గా ఉంటాడా? అనే ప్రశ్న బీసీసీఐని వెంటాడుతున్నట్లు తెలుస్తోంది. అంతేకాదు.. రోహిత్ ఒత్తిడి తక్కువగా ఉన్న మ్యాచ్‌ల్లో, బ్యాటింగ్‌కు అనుకూలమైన పిచ్‌లపై అద్భుతంగా ఆడుతున్నాడనే అభిప్రాయాలు కూడా వినిపిస్తున్నాయి. ఆస్ట్రేలియా, ఇంగ్లాండ్‌తో భారత్ సిరీస్‌లు కోల్పోయిన తర్వాత..
అదే జట్లపై రోహిత్ సెంచరీలు చేయడం కూడా ఆసక్తికరంగా మారింది. అందుకే ప్రపంచకప్‌కు ముందు రోహిత్ తన ఫిట్‌నెస్‌ను పూర్తిగా నిరూపించుకోవాల్సిన అవసరం ఉందని బీసీసీఐ వర్గాలు భావిస్తున్నట్లు సమాచారం. ఒకవేళ ప్రపంచకప్‌కు ముందు రోహిత్‌కు మళ్లీ ఫిట్‌నెస్ సమస్య వస్తే.. యశస్వి జైస్వాల్‌ను సిద్ధం చేయడం కష్టమవుతుందని అంటున్నారు. అందుకే ఇప్పటి నుంచే యశస్విని వన్డేల్లో ఎక్కువగా ఆడించి సిద్ధం చేయాలని క్రికెట్ విశ్లేషకులు సూచిస్తున్నారు. మరి రోహిత్ శర్మ ప్రపంచకప్ వరకు తన స్థానాన్ని కాపాడుకుంటాడా? లేక ఫిట్‌నెస్ కారణంగా కొత్త ఓపెనర్‌కు అవకాశం వస్తుందా? అనేది రాబోయే రోజుల్లో తేలనుంది.
