టీజీ twenty టోర్నీలో హైదరాబాద్ ఈ ఛాంపియన్స్ జట్టు అదిరిపోయే ప్రదర్శన చేస్తోంది. ఇప్పటికే వరుసగా రెండు మ్యాచ్లు గెలిచి పాయింట్ల పట్టికలో అగ్రస్థానంలో నిలిచింది. ఇప్పుడు ఈ జట్టు లక్ష్యం హ్యాట్రిక్ విజయం. శనివారం మెదక్ ఫాల్కన్స్తో జరిగే మ్యాచ్లో కూడా గెలిచి తమ జోరును కొనసాగించాలని చూస్తోంది.
మొదటి మ్యాచ్లో హైదరాబాద్ బౌలర్లు అద్భుతంగా రాణించారు. అజయ్ దేవ్ గౌడ్, యశ్వీర్ గౌడ్, ప్రణవ్ వర్మ కట్టుదిట్టంగా బౌలింగ్ చేసి ప్రత్యర్థి జట్టును తక్కువ స్కోరుకే పరిమితం చేశారు. ఆ తర్వాత అన్విత్ రెడ్డి, గణేశ్ గడుగు బాధ్యతాయుతంగా బ్యాటింగ్ చేసి జట్టుకు విజయాన్ని అందించారు.
రెండో మ్యాచ్లో పరిస్థితి కొంచెం భిన్నంగా కనిపించింది. బౌలర్లు సాధారణంగా బౌలింగ్ చేసినా, కెప్టెన్ అభిరథ్ రెడ్డి అద్భుత ఇన్నింగ్స్ ఆడాడు. కేవలం ఒక్క పరుగు దూరంలో శతకం చేజారినా, 99 పరుగులతో మ్యాచ్ను హైదరాబాద్ వైపు తిప్పేశాడు. కెప్టెన్గా కూడా మంచి నాయకత్వం చూపిస్తూ జట్టును వరుస విజయాల దిశగా నడిపిస్తున్నాడు.
బ్యాటింగ్ పరంగా చూస్తే హైదరాబాద్ జట్టుకు పెద్దగా సమస్యలు కనిపించడం లేదు. అయితే ఓపెనర్ సాయివికాస్ రెడ్డి ఇంకా తన పూర్తి ఫామ్ను అందుకోలేకపోయాడు. అలాగే గత మ్యాచ్లో అజయ్ దేవ్ కూడా ఆశించిన స్థాయిలో పరుగులు చేయలేకపోయాడు. ఈ మ్యాచ్లో వీరిద్దరూ రాణిస్తే హైదరాబాద్ మరింత బలంగా కనిపిస్తుంది.
బౌలింగ్లో మాత్రం ప్రణవ్ వర్మ జట్టుకు పెద్ద బలంగా మారాడు. తక్కువ పరుగులు ఇస్తూ, కీలక సమయాల్లో వికెట్లు తీస్తూ ప్రత్యర్థిపై ఒత్తిడి పెంచుతున్నాడు. అయితే టాప్ ఆర్డర్ త్వరగా ఔటైతే లోయర్ ఆర్డర్ ఎలా ఆడుతుందనేది మాత్రం ఇంకా సమాధానం లేని ప్రశ్నగానే ఉంది.
ఇదిలా ఉంటే హైదరాబాద్ జట్టుకు ఒక పెద్ద షాక్ కూడా తగిలింది. గత మ్యాచ్లో వరుసగా మూడు సిక్సర్లు కొట్టి ప్రేక్షకులను అలరించిన స్పిన్ ఆల్రౌండర్ యశ్వీర్ గౌడ్ ఇప్పుడు జట్టుకు అందుబాటులో ఉండడు. భారత్ అండర్-19 జట్టుకు ఎంపిక కావడంతో శ్రీలంకతో జరిగే సిరీస్ కోసం ఇప్పటికే బయలుదేరాడు. ఇది హైదరాబాద్కు కొంత లోటుగా మారే అవకాశం ఉంది.
ఇక మెదక్ ఫాల్కన్స్ విషయానికి వస్తే… ఈ జట్టు టోర్నీని అద్భుతంగా ప్రారంభించింది. తిలక్ అజేయ శతకంతో తొలి మ్యాచ్లో ఘన విజయం సాధించింది. కానీ ఆ తర్వాత తిలక్ జట్టును వీడడంతో పరిస్థితి పూర్తిగా మారిపోయింది. తర్వాతి రెండు మ్యాచ్ల్లో వరుస ఓటములు ఎదురయ్యాయి.
ప్రస్తుతం రవితేజ నాయకత్వంలోని మెదక్ జట్టు బౌలింగ్లో పర్వాలేదనిపిస్తున్నా, బ్యాటింగ్లో మాత్రం తీవ్రంగా ఇబ్బంది పడుతోంది. విక్రమ్ నాయక్, నమన్ అగర్వాల్పైనే ఎక్కువగా ఆధారపడుతోంది. వీరిలో ఎవరైనా విఫలమైతే మొత్తం జట్టు స్కోరు చేయడంలో కష్టపడుతోంది.
ఈ నేపథ్యంలో ఫుల్ కాన్ఫిడెన్స్తో ఉన్న హైదరాబాద్ ఈ ఛాంపియన్స్ను నిలువరించడం మెదక్ ఫాల్కన్స్కు అంత ఈజీ కాదు. ఒకవైపు హ్యాట్రిక్ విజయంపై హైదరాబాద్ కన్నేస్తే… మరోవైపు వరుస ఓటములకు బ్రేక్ వేయాలని మెదక్ ఫాల్కన్స్ భావిస్తోంది. మరి ఈ ఆసక్తికర పోరులో ఎవరు విజయం సాధిస్తారు? హైదరాబాద్ తన విజయాల జోరును కొనసాగిస్తుందా? లేక మెదక్ ఫాల్కన్స్ అందరినీ ఆశ్చర్యపరుస్తుందా? అనేది చూడాలి.
