యువ బ్యాటింగ్ సంచలనం వైభవ్ సూర్యవంశీ అత్యున్నత స్థాయిలో, విజయవంతం అయ్యే సామర్థ్యాన్ని ఇప్పటికే చూపించాడని సీనియర్ అంపైర్, మ్యాచ్ రిఫరీ విరేందర్ శర్మ అన్నారు. IPL లో అతడు కనబరిచిన ప్రదర్శనలు భవిష్యత్తులో అతని విజయాలకు సంకేతమని అభిప్రాయపడ్డారు.
వైభవ్ను అద్భుతమైన ప్రతిభ కలిగిన ఆటగాడిగా పేర్కొన్న శర్మ, అతడి సహజసిద్ధమైన నైపుణ్యాలను ప్రశంసించారు. ముఖ్యంగా అతడి బలం, చూపు, హ్యాండ్-ఐ కోఆర్డినేషన్ ఎంతో ఆకట్టుకున్నాయని చెప్పారు.
“గత కొన్ని IPL సీజన్లలో అతడిని గమనించాను. అతడి చేతుల్లో మంచి బలం ఉంది. అద్భుతమైన చూపు, హ్యాండ్-ఐ కోఆర్డినేషన్ కలిగి ఉన్నాడు” అని శర్మ తెలిపారు.
భారత క్రికెట్కు వైభవ్ వంటి యువ ఆటగాడు దొరకడం మంచి విషయమని ఆయన పేర్కొన్నారు. అయితే అతడి అభివృద్ధి గురించి పూర్తి స్థాయిలో చెప్పాలంటే, మరో రెండు నుంచి మూడు సంవత్సరాలు గమనించాల్సి ఉంటుందని అన్నారు.
వైభవ్ ప్రస్తుతం దేశంలోని అత్యంత ప్రతిభావంతమైన యువ క్రికెటర్లలో ఒకరిగా గుర్తింపు పొందుతున్నాడు. అతడి నిర్భయమైన బ్యాటింగ్ శైలి క్రికెట్ అభిమానులను విశేషంగా ఆకట్టుకుంటోంది.అనుభవజ్ఞులైన బౌలర్లను సైతం ధైర్యంగా ఎదుర్కొంటూ దూకుడుగా పరుగులు సాధించే సామర్థ్యం అతడిలో కనిపిస్తోందని క్రికెట్ నిపుణులు భావిస్తున్నారు.
ప్రపంచంలోని అత్యుత్తమ బౌలర్లను ఎదుర్కొనే IPL వంటి టోర్నమెంట్లో నిలకడగా రాణించడం అంతర్జాతీయ విజయానికి బలమైన సూచిక అని శర్మ అభిప్రాయపడ్డారు.
వైభవ్ అంతర్జాతీయ స్థాయిలో కూడా IPL లో చూపిన విజయాన్ని కొనసాగించగలడా అని అడిగితే, “ఖచ్చితంగా సాధించగలడు” అని శర్మ ధీమా వ్యక్తం చేశారు.
“IPL ప్రపంచంలోనే అత్యంత సవాళ్లతో కూడిన టోర్నమెంట్. అక్కడ విజయవంతంగా రాణిస్తున్నాడంటే అతడికి పెద్ద స్థాయిలో పరుగులు చేసే సామర్థ్యం ఉందని అర్థం” అని ఆయన చెప్పారు.IPL 2026లో వైభవ్ 776 పరుగులతో అత్యధిక పరుగులు చేసిన బ్యాటర్గా నిలిచాడు. ఒక సెంచరీ, ఐదు అర్ధసెంచరీలతో పాటు 237.30 స్ట్రైక్రేట్ నమోదు చేసి భారత జట్టు నుంచి తొలి పిలుపు అందుకున్నాడు.
