హైదరాబాద్ టీ twenty లీగ్లో ప్లే ఆఫ్స్ రేసు మరింత ఆసక్తికరంగా మారింది. ఒకవైపు హైదరాబాద్ ఛాంపియన్స్ తమ అద్భుత ప్రదర్శనతో మరోసారి సత్తా చాటగా, మరోవైపు సన్గ్రౌండ్ వైబ్స్ కూడా కీలక విజయంతో ప్లే ఆఫ్స్ అవకాశాలను మరింత బలపరుచుకుంది. ఇక వరంగల్ వారియర్స్, పాలమూరు స్టాలియన్స్ మధ్య మ్యాచ్ మాత్రం వర్షం కారణంగా రద్దవడంతో పాయింట్ల పట్టికలో పెద్దగా మార్పు కనిపించలేదు.
ముందుగా హైదరాబాద్ ఛాంపియన్స్ ప్రదర్శన గురించి చెప్పాలంటే… ఈ జట్టు లీగ్ మొత్తంలోనే అత్యంత బలమైన జట్టుగా నిలుస్తోంది. వరుస విజయాలతో ప్రత్యర్థులకు చుక్కలు చూపిస్తున్న హైదరాబాద్ ఛాంపియన్స్ మరోసారి తమ బ్యాటింగ్, బౌలింగ్, ఫీల్డింగ్లో పూర్తి ఆధిపత్యాన్ని ప్రదర్శించింది. ఈ మ్యాచ్లో మొదట బ్యాటింగ్ చేసిన హైదరాబాద్ ఛాంపియన్స్ నిర్ణీత ఓవర్లలో ఏకంగా 353 పరుగుల భారీ స్కోరు నమోదు చేసి ప్రత్యర్థి ముందు కొండంత లక్ష్యాన్ని ఉంచింది.
జట్టు కెప్టెన్ అఖిల్ రెడ్డి, శ్రీకర్ పాములతో పాటు ఇతర బ్యాటర్లు కూడా అద్భుతంగా రాణించారు. గౌతమ్ గుడుగు బ్యాట్తోనే కాదు, బంతితో కూడా ఆకట్టుకుంటూ ఆల్రౌండ్ ప్రదర్శన చేశాడు. అనిల్ రెడ్డి, ప్రభు వర్మ, శుభం అగ్నిస్, అరవింద్ చౌదరి కూడా వేగంగా పరుగులు చేస్తూ జట్టు స్కోరును భారీ స్థాయికి చేర్చారు. బౌలింగ్లో వరుణ్ కాస్ అద్భుతంగా రాణించడంతో ప్రత్యర్థి ఆర్బీఎస్ గోల్డ్ బ్యాటర్లు పూర్తిగా చేతులెత్తేశారు. రాహుల్ రాఠోడ్, శ్రీకర్, దేవ్ మెహతా వంటి బ్యాటర్లు కూడా హైదరాబాద్ బౌలర్లను ఎదుర్కోలేక వరుసగా వికెట్లు కోల్పోయారు. దీంతో హైదరాబాద్ ఛాంపియన్స్ మరో భారీ విజయాన్ని ఖాతాలో వేసుకుని ప్లే ఆఫ్స్కు మరింత చేరువైంది.
ఇక మరో మ్యాచ్లో సన్గ్రౌండ్ వైబ్స్ కూడా అదిరిపోయే ఆటతీరుతో మెడక్ ఫాల్కన్స్ను 8 వికెట్ల తేడాతో చిత్తు చేసింది. ముందుగా బ్యాటింగ్ చేసిన మెడక్ ఫాల్కన్స్ నిర్ణీత 20 ఓవర్లలో 4 వికెట్ల నష్టానికి 180 పరుగులు చేసింది. రవితేజ 33 పరుగులు, ప్రశాంత్ రెడ్డి 30 పరుగులతో రాణించినా, భారీ స్కోరు నమోదు చేయడంలో విఫలమైంది.
181 పరుగుల లక్ష్యంతో బరిలోకి దిగిన సన్గ్రౌండ్ వైబ్స్కు గౌతమ్ రెడ్డి అద్భుతమైన ఇన్నింగ్స్ ఆడాడు. కేవలం 47 బంతుల్లోనే 101 పరుగులతో నాటౌట్గా నిలిచి మ్యాచ్ను ఏకపక్షంగా మార్చేశాడు. అతని ఇన్నింగ్స్లో 6 ఫోర్లు, 9 భారీ సిక్సర్లు ఉండడం విశేషం. జస్వంత్ మోటే 34 పరుగులు, నిఖిల్ రెడ్డి 21 పరుగులు, రాహుల్ బుడ్డి 20 పరుగులతో నాటౌట్గా నిలిచి గౌతమ్కు మంచి సహకారం అందించారు. ఫలితంగా సన్గ్రౌండ్ వైబ్స్ కేవలం 16.3 ఓవర్లలోనే రెండు వికెట్లు మాత్రమే కోల్పోయి లక్ష్యాన్ని ఛేదించి ప్లే ఆఫ్స్ అవకాశాలను మరింత బలపరుచుకుంది.
మరోవైపు వరంగల్ వారియర్స్, పాలమూరు స్టాలియన్స్ మధ్య జరగాల్సిన మ్యాచ్ వర్షం కారణంగా రద్దైంది. వరంగల్ వారియర్స్ 2.3 ఓవర్లలో 23 పరుగులకు ఒక వికెట్ కోల్పోయిన సమయంలో భారీ వర్షం కురవడంతో ఆటను కొనసాగించడం సాధ్యపడలేదు. చివరకు అంపైర్లు మ్యాచ్ను రద్దు చేసినట్లు ప్రకటించారు. ఇప్పటికే ఈ రెండు జట్లు ప్లే ఆఫ్స్ రేసు నుంచి తప్పుకోవడంతో ఈ ఫలితం పాయింట్ల పట్టికపై పెద్దగా ప్రభావం చూపలేదు.
మొత్తానికి హైదరాబాద్ టీ twenty లీగ్లో హైదరాబాద్ ఛాంపియన్స్, సన్గ్రౌండ్ వైబ్స్ అద్భుత విజయాలతో ప్లే ఆఫ్స్ రేసులో తమ స్థానాన్ని మరింత బలపరుచుకున్నాయి. ఇక లీగ్ చివరి దశకు చేరుకుంటున్న వేళ ప్లే ఆఫ్స్కు ఏ జట్లు అర్హత సాధిస్తాయన్నది మరింత ఆసక్తికరంగా మారింది.
