టీమిండియా యువ ఫాస్ట్ బౌలర్ అర్ష్దీప్ సింగ్ తాజాగా తనకు అత్యంత ఇష్టమైన ఐదుగురు భారత బౌలర్ల జాబితాను వెల్లడించాడు. అయితే ఈ జాబితాలో భారత స్టార్ పేసర్ జస్ప్రీత్ బుమ్రా లేకపోవడం అందరినీ ఆశ్చర్యానికి గురి చేసింది. ప్రస్తుతం ప్రపంచంలోనే అత్యుత్తమ బౌలర్లలో ఒకడిగా గుర్తింపు పొందిన బుమ్రాను పక్కన పెట్టడం సోషల్ మీడియాలో పెద్ద చర్చకు దారితీసింది. కృష్ణాంక్ అత్రే యూట్యూబ్ ఛానెల్కు ఇచ్చిన ఇంటర్వ్యూలో అర్ష్దీప్ తన టాప్-5 బౌలర్ల పేర్లను వెల్లడించాడు. ఈ జాబితాలో మొదటి స్థానాన్ని మాజీ భారత స్వింగ్ కింగ్ భువనేశ్వర్ కుమార్కు ఇచ్చాడు. భువనేశ్వర్ కుమార్ను నంబర్-1గా ఎందుకు ఎంచుకున్నావని అడగగా అర్ష్దీప్ ఆసక్తికర సమాధానం ఇచ్చాడు.
“భువీ భాయ్ నాకు వ్యక్తిగతంగా ఎంతో ఇష్టమైన బౌలర్. ఆయనంటే నాకు ప్రత్యేకమైన అభిమానం ఉంది. అందుకే కొంచెం పక్షపాతం చూపించానని చెప్పొచ్చు. కొత్త బంతితో ఆయన చూపించే నియంత్రణ, స్వింగ్ చేయించే తీరు అసాధారణం” అని చెప్పాడు. రెండో స్థానంలో మహ్మద్ షమీకి చోటు కల్పించాడు. ఏ పిచ్పైనైనా బంతిని సీమ్ చేయగల సామర్థ్యం షమీ ప్రత్యేకత అని అర్ష్దీప్ కొనియాడాడు. “షమీ భాయ్ బంతిని ఎలాంటి పరిస్థితుల్లోనైనా అద్భుతంగా సీమ్ చేస్తాడు. ఆయన సీమ్ పొజిషన్ ప్రపంచస్థాయి” అని ప్రశంసించాడు. మూడో స్థానంలో స్పిన్నర్ కుల్దీప్ యాదవ్ను ఎంపిక చేశాడు. ఎడమచేతి చైనామన్ బౌలర్గా కుల్దీప్కు చాలా అరుదైన నైపుణ్యం ఉందని, ప్రపంచ క్రికెట్లో అలాంటి బౌలర్లు చాలా తక్కువమందే ఉంటారని చెప్పాడు. నాలుగో స్థానంలో యుజ్వేంద్ర చాహల్కు చోటు ఇచ్చాడు. పంజాబ్ జట్టులో తన సహచరుడైన చాహల్ ఎన్నో వికెట్లు తీసి తన విలువను నిరూపించుకున్నాడని అర్ష్దీప్ పేర్కొన్నాడు.
ఐదో స్థానంలో భారత మాజీ ఆఫ్స్పిన్నర్ రవిచంద్రన్ అశ్విన్ను ఎంపిక చేశాడు. అయితే అశ్విన్ను చివరి స్థానంలో ఉంచినందుకు సరదాగా క్షమాపణలు కూడా చెప్పాడు. “అశ్ భాయ్ను చివర్లో పెట్టాలని అనుకోలేదు. కానీ స్థానాలు అయిపోయాయి. ఐపీఎల్లో నాకు తొలి కెప్టెన్ కూడా ఆయనే. కలిసినప్పుడు లేదా మెసేజ్ చేసి తప్పకుండా సారీ చెబుతాను” అని నవ్వుతూ వ్యాఖ్యానించాడు. అయితే ఈ జాబితాలో జస్ప్రీత్ బుమ్రా లేకపోవడం అభిమానులను ఆశ్చర్యానికి గురి చేసింది. ఆధునిక క్రికెట్లో అత్యుత్తమ ఫాస్ట్ బౌలర్లలో ఒకడిగా పేరున్న బుమ్రాకు చోటు లేకపోవడంపై సోషల్ మీడియాలో అభిమానులు భిన్నాభిప్రాయాలు వ్యక్తం చేస్తున్నారు. కొందరు అర్ష్దీప్ తన వ్యక్తిగత అభిప్రాయాన్ని మాత్రమే వెల్లడించాడని చెబుతుండగా, మరికొందరు బుమ్రాను విస్మరించడం సరైన నిర్ణయం కాదని అభిప్రాయపడుతున్నారు.
