టీమిండియా స్టార్ బ్యాటర్, వన్డేల్లో ఎన్నో అద్భుతమైన ఇన్నింగ్స్ ఆడిన, రోహిత్ శర్మ ఇప్పుడు తీవ్ర ఫామ్ సమస్యను ఎదుర్కొంటున్నాడు. ఒకప్పుడు బౌలర్లకు భయంగా కనిపించిన హిట్ మ్యాన్… ఇప్పుడు మాత్రం అదే బౌలర్లకు సులభమైన వికెట్గా మారుతున్నాడనే విమర్శలు వినిపిస్తున్నాయి. ఇంగ్లండ్తో జరుగుతున్న వన్డే సిరీస్లో తొలి రెండు మ్యాచ్ల్లో, రోహిత్ ప్రదర్శన అభిమానులను తీవ్ర నిరాశకు గురిచేసింది. ఎడ్జ్బాస్టన్లో జరిగిన మొదటి వన్డేలో రోహిత్ 21 బంతులు ఆడి కేవలం 11 పరుగులు మాత్రమే చేశాడు.
ఆ ఇన్నింగ్స్లో ఒక్క బౌండరీ మాత్రమే కొట్టాడు. తర్వాత కార్డిఫ్లో జరిగిన రెండో వన్డేలో 47 బంతులు ఎదుర్కొని కేవలం 26 పరుగులకే ఔటయ్యాడు. ఈ రెండు మ్యాచ్ల్లో కలిపి రోహిత్ చేసిన పరుగులు కేవలం 37 మాత్రమే. మొత్తం రెండు బౌండరీలు, ఒక సిక్స్ మాత్రమే కొట్టాడు. అతని స్ట్రైక్రేట్ కూడా 54 చుట్టూనే ఉండటం అభిమానులను ఆందోళనకు గురిచేస్తోంది. ఇంకా ఆశ్చర్యకరమైన విషయము ఏమిటంటే… మొదటి వన్డేలో రోహిత్ ఎదుర్కొన్న 21 బంతుల్లో 14 బంతులకు ఒక్క పరుగు కూడా రాలేదు. అంటే దాదాపు 67 శాతం డాట్ బాల్స్. రెండో మ్యాచ్లో కూడా 47 బంతుల్లో 28 డాట్ బాల్స్ ఆడాడు. అంటే దాదాపు 60 శాతం బంతులను పరుగులుగా మార్చలేకపోయాడు. మొదటి మ్యాచ్లో జోఫ్రా ఆర్చర్ బౌలింగ్ ముందు రోహిత్ పూర్తిగా ఇబ్బంది పడ్డాడు. కొన్ని బంతులు బ్యాట్ అంచును తాకగా… మరికొన్ని బంతులు బ్యాట్ను దాటిపోయాయి. మరోవైపు జోష్ టంగ్ వేగవంతమైన బంతులతో కూడా రోహిత్ను ఒత్తిడిలోకి నెట్టాడు.
ఒకప్పుడు పుల్ షాట్లు, ఫ్లిక్ షాట్లు, కవర్ డ్రైవ్లతో బౌలర్లపై ఆధిపత్యం చెలాయించిన రోహిత్… ఇప్పుడు అదే షాట్లు ఆడటానికే ఇబ్బంది పడుతున్నట్లు కనిపిస్తోంది. రెండో వన్డేలో కూడా పరిస్థితి మారలేదు. ఆర్చర్, సకీబ్ మహ్మూద్, గస్ అట్కిన్సన్ బౌలింగ్లో పలుమార్లు బీట్ అయ్యాడు. చివరకు విల్ జాక్స్ వేసిన బంతిని స్వీప్ చేయడానికి ప్రయత్నించి, టాప్ ఎడ్జ్ ఇచ్చి వికెట్ కీపర్ జోస్ బట్లర్కు క్యాచ్ ఇచ్చి ఔటయ్యాడు. మ్యాచ్ల్లో మాత్రమే కాదు… నెట్స్లో కూడా రోహిత్ ఆశించిన స్థాయిలో కనిపించడం లేదు. సిరీస్ ప్రారంభానికి ముందు సైడార్మ్ బౌలర్లతో ఎక్కువసేపు ప్రాక్టీస్ చేసినా టైమింగ్ దొరకక ఇబ్బంది పడ్డాడు. మ్యాచ్ పరిస్థితులను పోలి ఉండేలా ప్రత్యేకంగా ప్రాక్టీస్ చేసినప్పటికీ… దాని ప్రభావం మ్యాచ్లో కనిపించలేదు.
అయితే రోహిత్ కెరీర్ మొత్తం ఇలాగే లేదని గుర్తుంచుకోవాలి. ఇటీవల అఫ్గానిస్థాన్తో జరిగిన మూడు వన్డేల్లో 16, 48, 79 పరుగులు చేసి మంచి ఫామ్ చూపించాడు. కానీ 2026 ఐపీఎల్లో మాత్రం తొమ్మిది మ్యాచ్ల్లో కేవలం 283 పరుగులు మాత్రమే చేశాడు. ఇప్పుడు టీమిండియా సెలెక్టర్లను ఎక్కువగా ఆలోచింపజేస్తున్న విషయము… 2027 వన్డే వరల్డ్ కప్. యశస్వి జైస్వాల్ లాంటి యువ ఆటగాడు మంచి ఫామ్లో ఉన్నాడు. అయినా రోహిత్ అనుభవాన్ని దృష్టిలో పెట్టుకుని అతడికి అవకాశాలు ఇస్తున్నారు. కానీ ప్రస్తుతం అతని ఫామ్ మాత్రం జట్టుకు ఆందోళన కలిగిస్తోంది. గత వన్డే వరల్డ్ కప్ తర్వాత రోహిత్ భారత జట్టుకు అత్యధిక పరుగులు చేసిన ఆటగాళ్లలో ఒకడే అయినప్పటికీ… గత ఏడాది నుంచి చూస్తే శుభ్మన్ గిల్, విరాట్ కోహ్లీ ఇద్దరూ అతనికంటే మెరుగైన ప్రదర్శన చేస్తున్నారు. రోహిత్ బాడీ లాంగ్వేజ్ కూడా గతంతో పోలిస్తే అంత ఆత్మవిశ్వాసంగా కనిపించడం లేదు. ఫాస్ట్ బౌలర్లను ఎదుర్కొనే సమయంలో ఇబ్బంది పడుతున్నాడు.
ఫీల్డింగ్లో కూడా అంత చురుకుగా కనిపించడం లేదు. గాయాల సమస్యలు కూడా అతన్ని వెంటాడుతున్నాయి. 2027 వన్డే వరల్డ్ కప్ జరిగే సమయానికి రోహిత్ వయసు 40 సంవత్సరాలు ఉంటుంది. ఆ వయసులో కూడా వరల్డ్ కప్ ఆడిన క్రిస్ గేల్, బ్రాడ్ హాగ్, మహ్మద్ హఫీజ్, ఇమ్రాన్ తాహిర్ వంటి ఆటగాళ్ల సరసన నిలవాలంటే… ఇప్పటి నుంచే తన ఫామ్ను తిరిగి అందుకోవాల్సిన అవసరం ఉంది. అయితే క్రికెట్లో ఫామ్ తాత్కాలికం… క్లాస్ శాశ్వతం అని అంటారు. రోహిత్ శర్మ కూడా గతంలో ఎన్నోసార్లు విమర్శలకు సమాధానం బ్యాట్తోనే ఇచ్చాడు. ఈసారి కూడా అదే చేస్తాడా… లేక టీమిండియా వరల్డ్ కప్ ప్రణాళికల్లో మార్పులు వస్తాయా అనేది రాబోయే మ్యాచ్ల్లో తేలిపోతుంది.
