రిషభ్ పంత్ గిఫ్ట్ రిక్వెస్ట్.. స్పందించిన ఉత్తరాఖండ్ సీఎం పుష్కర్ సింగ్ ధామీ టీమిండియా స్టార్ వికెట్ కీపర్ బ్యాటర్ రిషభ్ పంత్ చేసిన ఓ సోషల్ మీడియా పోస్ట్ ఇప్పుడు వైరల్గా మారింది. అర్ధరాత్రి సమయంలో ఉత్తరాఖండ్ ముఖ్యమంత్రి పుష్కర్ సింగ్ ధామీని ట్యాగ్ చేస్తూ పంత్ చేసిన విజ్ఞప్తి ప్రస్తుతం క్రికెట్ అభిమానుల్లో చర్చనీయాంశంగా మారింది. అయితే పంత్ అడిగింది ఏదో ఖరీదైన గిఫ్ట్ కాదు.. తన సొంత రాష్ట్రం ఉత్తరాఖండ్లో ఒక స్థలం కావాలని కోరాడు.
ఢిల్లీలో ఉంటున్న తన బేస్ను ఉత్తరాఖండ్కు మార్చుకోవాలని, అక్కడే తన సొంత ఇల్లు నిర్మించుకుని తన ప్రాంత ప్రజలకు దగ్గరగా ఉండాలని పంత్ తన కోరికను వ్యక్తం చేశాడు. శనివారం అర్ధరాత్రి 12:46 గంటల సమయంలో రిషభ్ పంత్ సోషల్ మీడియా ప్లాట్ఫామ్ X లో ఉత్తరాఖండ్ సీఎం పుష్కర్ సింగ్ ధామీని ట్యాగ్ చేస్తూ ఒక పోస్టు చేశాడు. తాను ఉత్తరాఖండ్కు చెందిన వ్యక్తినని, తన సొంత రాష్ట్రం అంటే తనకు ఎంతో ఇష్టమని పంత్ చెప్పాడు.
గత కొంతకాలంగా ఢిల్లీ నుంచి తన బేస్ను ఉత్తరాఖండ్కు మార్చుకోవాలని ప్రయత్నిస్తున్నానని, ఇందుకోసం అక్కడ పెద్దగా, సౌకర్యవంతంగా ఉండే స్థలం కోసం వెతుకుతున్నప్పటికీ ఇప్పటివరకు సరైన భూమి దొరకలేదని సీఎం ధామీని కోరాడు. పంత్ తన పోస్టులో తాను ఉత్తరాఖండ్లోనే తిరిగి స్థిరపడాలని అనుకుంటున్నట్లు స్పష్టం చేశాడు. అంతేకాకుండా తన సొంత ప్రాంతానికి తిరిగి వచ్చి అక్కడి ప్రజల కోసం ఏదైనా చేయాలని, ఉత్తరాఖండ్ అభివృద్ధిలో తన వంతు సహాయం అందించాలని కూడా చెప్పాడు. తన పహాడీ ప్రజలతో కలిసి ఉండాలని ఉందని, అందుకే ఈ విషయంలో ప్రభుత్వం తనకు సహాయం చేయాలని పంత్ విజ్ఞప్తి చేశాడు.
గత మూడు సంవత్సరాలుగా భూమి కోసం ప్రయత్నిస్తున్నప్పటికీ ఇప్పటివరకు సమస్య పరిష్కారం కాలేదని కూడా తన పోస్టులో పేర్కొన్నాడు. అయితే రిషభ్ పంత్ చేసిన ఈ పోస్ట్లోని అసలు విషయం కంటే, అతను దాన్ని అర్ధరాత్రి సమయంలో పోస్ట్ చేయడం, అలాగే పోస్టులో కనిపించిన కొన్ని టైపింగ్ మరియు గ్రామర్ తప్పులు సోషల్ మీడియా లో ఎక్కువగా చర్చకు దారితీశాయి. పంత్ ఇలా ఎందుకు అర్ధరాత్రి సమయంలో పోస్ట్ చేశాడంటూ కొందరు అభిమానులు ఆశ్చర్యం వ్యక్తం చేశారు. మరికొందరు మాత్రం అతను తన స్వస్థలంపై ఉన్న ప్రేమతోనే ఈ విషయాన్ని నేరుగా ముఖ్యమంత్రి దృష్టికి తీసుకెళ్లాడని అభిప్రాయపడ్డారు.
ఇక పంత్ చేసిన ఈ విజ్ఞప్తిపై ఉత్తరాఖండ్ ముఖ్యమంత్రి పుష్కర్ సింగ్ ధామీ వెంటనే స్పందించడం విశేషంగా మారింది. రిషభ్ పంత్ను ఉత్తరాఖండ్ గర్వకారణంగా అభివర్ణించిన సీఎం ధామీ.. క్రికెట్లో అతని అద్భుతమైన ప్రదర్శనలు, విజయాలతో దేశంలోనే కాకుండా ప్రపంచవ్యాప్తంగా ఉత్తరాఖండ్ పేరును నిలబెట్టాడని ప్రశంసించారు. తన మాతృభూమిపై పంత్కు ఉన్న ప్రేమ, తిరిగి ఉత్తరాఖండ్కు వచ్చి అక్కడి ప్రజలకు సేవ చేయాలనే ఆలోచనను కూడా సీఎం ధామీ అభినందించారు. అంతేకాదు, పంత్ అడిగిన భూమికి సంబంధించిన విషయంపై సంబంధిత అధికారులకు ఇప్పటికే ఆదేశాలు జారీ చేస్తున్నట్లు ధామీ తెలిపారు.
త్వరలోనే అధికారులు రిషభ్ పంత్ను సంప్రదించి అతని సమస్యను తెలుసుకుంటారని, నిబంధనలకు అనుగుణంగా సాధ్యమైనంత సహాయం అందిస్తారని సీఎం స్పష్టం చేశారు. దీంతో పంత్ చేసిన విజ్ఞప్తికి ప్రభుత్వం నుంచి సానుకూల స్పందన వచ్చినట్లయింది. రిషభ్ పంత్కు ఉత్తరాఖండ్తో ప్రత్యేకమైన అనుబంధం ఉంది. ఉత్తరాఖండ్లోని రూర్కీ ప్రాంతానికి చెందిన పంత్ తన క్రికెట్ ప్రయాణంలో ఎన్నో విజయాలను సాధించి రాష్ట్రానికి మంచి గుర్తింపు తీసుకొచ్చాడు. భారత క్రికెట్ జట్టులో కీలక ఆటగాడిగా ఎదిగిన తర్వాత కూడా తన స్వస్థలాన్ని, అక్కడి ప్రజలను మర్చిపోలేదని పంత్ ఈ తాజా పోస్టుతో మరోసారి చూపించాడు.
అయితే పంత్ చేసిన ఈ విజ్ఞప్తిని అభిమానులు సరదాగా కూడా తీసుకుంటున్నారు. ఒక స్టార్ క్రికెటర్ ముఖ్యమంత్రిని ట్యాగ్ చేసి స్వయంగా భూమి కావాలని అడగడం అరుదైన విషయమని కొందరు కామెంట్లు చేస్తున్నారు. మరికొందరు మాత్రం పంత్ తన స్వస్థలంలో ఇల్లు కట్టుకుని అక్కడి ప్రజలకు ఏదైనా చేయాలనే ఆలోచనను అభినందిస్తున్నారు. మొత్తానికి రిషభ్ పంత్ చేసిన ఈ అర్ధరాత్రి సోషల్ మీడియా పోస్టు ఇప్పుడు వైరల్గా మారింది. ఢిల్లీ నుంచి తన బేస్ను ఉత్తరాఖండ్కు మార్చుకోవాలని, తన సొంత రాష్ట్రంలో స్థిరపడి అక్కడి ప్రజల కోసం పనిచేయాలని పంత్ కోరుకోవడం ఆసక్తికరంగా మారింది. ఇక సీఎం పుష్కర్ సింగ్ ధామీ కూడా ఈ విషయాన్ని సీరియస్గా తీసుకుని సంబంధిత అధికారులకు ఆదేశాలు ఇవ్వడంతో ఈ వ్యవహారం ఎలాంటి మలుపు తిరుగుతుందో చూడాలి.
