బెన్ స్టోక్స్ భవిష్యత్తుపై మౌనం వీడాడు.. కోచింగ్ ప్లాన్ బయటపెట్టేశాడు! ఇంగ్లాండ్ మాజీ టెస్ట్ కెప్టెన్ బెన్ స్టోక్స్.. తన భవిష్యత్తు గురించి ఆసక్తికరమైన విషయాలు వెల్లడించాడు. క్రికెట్కు పూర్తిగా రిటైర్మెంట్ ప్రకటించిన తర్వాత.. ఇక తాను ఏం చేయాలనుకుంటున్నాడో కూడా స్టోక్స్ స్పష్టంగా చెప్పేశాడు. అయితే స్టోక్స్ మళ్లీ ఇంగ్లాండ్ తరఫున ఆడతాడా? లేక కొత్త పాత్రలో కనిపించబోతున్నాడా? స్టోక్స్ ప్రకారం.. భవిష్యత్తులో తనకు కోచ్గా కొనసాగాలని ఉందట. ప్రస్తుతం ఆట కొనసాగిస్తూనే లెవల్ 3 కోచింగ్ కోర్సు కూడా చేస్తున్నానని చెప్పాడు. ఆ కోర్సు పూర్తయ్యాక.. ఆటగాడిగా తన ప్రయాణం ముగిసిన తర్వాత కోచింగ్లోకి రావాలని అనుకుంటున్నట్లు తెలిపాడు. అంతేకాదు.. ఒక రోజు ఇంగ్లాండ్ జట్టుకే కోచ్గా పనిచేయాలని తనకు చాలా ఇష్టమని స్టోక్స్ చెప్పాడు. ఆటగాడిగా మైదానంలో నాయకత్వం వహించిన తర్వాత.. భవిష్యత్తులో కూడా ఏదో ఒక నాయకత్వ బాధ్యతలో ఉండాలని కోరుకుంటున్నట్లు వెల్లడించాడు.
ఇక ఇంగ్లాండ్ కొత్త టెస్ట్ కెప్టెన్ ఎంపికపై కూడా స్టోక్స్ స్పందించాడు. తన తర్వాత హ్యారీ బ్రూక్ కెప్టెన్ అవుతాడని స్టోక్స్ భావించాడు. బ్రూక్కు టెస్ట్ జట్టులో వైస్ కెప్టెన్ బాధ్యతలు కూడా ఇచ్చారు. కానీ చివరికి జో రూట్ను కెప్టెన్గా ఎంపిక చేయడంపై స్టోక్స్ ఆశ్చర్యం వ్యక్తం చేశాడు. “ఎవరైనా మంచి కెప్టెన్ అవుతారని అనుకుంటే.. వాళ్లకు ఆ బాధ్యత ఇచ్చేయాలి. బ్రూక్ వైస్ కెప్టెన్గా ఉన్నాడు. కెప్టెన్ ఆడటం లేదు. అయినా అతనికి కెప్టెన్సీ ఇవ్వలేదు. ఇది అతనికి ఎలాంటి మెసేజ్ ఇస్తుంది?” అంటూ స్టోక్స్ ప్రశ్నించాడు. అయితే జో రూట్పై మాత్రం స్టోక్స్ ఎలాంటి వ్యతిరేక వ్యాఖ్యలు చేయలేదు. రూట్ గొప్పగా రాణించాలని కోరుకుంటున్నానని.. అతను కెప్టెన్గా మంచి విజయాలు సాధిస్తాడని చెప్పాడు.
స్టోక్స్ 2022 నుంచి నాలుగేళ్ల పాటు ఇంగ్లాండ్ టెస్ట్ కెప్టెన్గా పనిచేశాడు. ఆ సమయంలో కోచ్ బ్రెండన్ మెకల్లమ్తో కలిసి ఇంగ్లాండ్ ఆటతీరును పూర్తిగా మార్చాడు. ఆ దూకుడైన ఆటతీరుకే ‘బాజ్బాల్’ అనే పేరు వచ్చింది. అయితే ఇటీవల ఇంగ్లాండ్ టెస్ట్ జట్టు వరుసగా మ్యాచ్లలో తడబడింది. గత తొమ్మిది టెస్టుల్లో ఏడు మ్యాచ్లు ఓడిపోయింది. స్టోక్స్ రిటైర్మెంట్ ప్రకటించిన కొద్దికాలానికే మెకల్లమ్ టెస్ట్ కోచ్ పదవి నుంచి తప్పుకున్నాడు. ఆ తర్వాత మాజీ న్యూజిలాండ్ కెప్టెన్ స్టీఫెన్ ఫ్లెమింగ్ను ఇంగ్లాండ్ కొత్త టెస్ట్ కోచ్గా నియమించింది.
మెకల్లమ్ తనకు కోచ్గా కొనసాగనని చెప్పిన విషయాన్ని కూడా స్టోక్స్ గుర్తు చేసుకున్నాడు. అయితే ఇప్పుడు అసలు ప్రశ్న.. స్టోక్స్ మళ్లీ ఇంగ్లాండ్ తరఫున ఆడతాడా? ఇంగ్లాండ్ క్రికెట్ మేనేజింగ్ డైరెక్టర్ రాబ్ కీ.. స్టోక్స్ అంతర్జాతీయ క్రికెట్కు తిరిగి రావడానికి తలుపులు ఇంకా తెరిచే ఉన్నాయని చెప్పాడు. కానీ స్టోక్స్ మాత్రం వచ్చే ఏడాది ఇంగ్లాండ్లో జరిగే యాషెస్ సిరీస్లో తిరిగి ఆడే అవకాశం లేదని స్పష్టం చేశాడు. తాను రిటైర్మెంట్ తీసుకున్నప్పుడు మళ్లీ ఇంగ్లాండ్ తరఫున ఆడాలనే ఆలోచన తనకు అసలు లేదని చెప్పాడు. 35 ఏళ్ల వయసులో కెప్టెన్గా కాకుండా ఇంగ్లాండ్ తరఫున ఆడటం తనకు కష్టంగా అనిపిస్తుందని స్టోక్స్ తెలిపాడు. అందుకే ఆటగాడిగా ఇంగ్లాండ్ క్రికెట్కు గుడ్బై చెప్పడంపై తాను పూర్తిగా సంతృప్తిగా ఉన్నానని స్పష్టం చేశాడు. అంటే.. బెన్ స్టోక్స్ రీఎంట్రీకి అవకాశం ఉన్నప్పటికీ.. అతని మాటలను బట్టి చూస్తే ఇప్పుడు అతని ఫోకస్ మాత్రం కోచింగ్పైనే ఉంది. భవిష్యత్తులో ఇంగ్లాండ్ ఆటగాడిగా కాదు.. ఇంగ్లాండ్ కోచ్గా బెన్ స్టోక్స్ను చూసే అవకాశం ఉందన్నమాట!
