భారత్తో జరిగిన తొలి టీ twenty లో జింబాబ్వేకు 7 వికెట్ల తేడాతో ఓటమి ఎదురైంది. అయితే మ్యాచ్ ముగిసిన తర్వాత జింబాబ్వే కెప్టెన్ సికందర్ రజా చేసిన వ్యాఖ్యలు ఇప్పుడు చర్చనీయాంశంగా మారాయి. ఓటమికి ప్రధాన కారణం పిచ్నే అని ఆయన అభిప్రాయపడ్డాడు. హరారే స్పోర్ట్స్ క్లబ్లో జరిగిన ఈ మ్యాచ్లో మొదట బ్యాటింగ్ చేసిన జింబాబ్వే 20 ఓవర్లలో 7 వికెట్లకు 125 పరుగులు చేసింది. ఆ తర్వాత బ్యాటింగ్కు దిగిన భారత్ కేవలం 13.2 ఓవర్లలోనే లక్ష్యాన్ని ఛేదించి సిరీస్లో 1-0 ఆధిక్యం సాధించింది. భారత్ విజయానికి యువ ఆటగాడు వైభవ్ సూర్యవంశీ అద్భుత ఇన్నింగ్స్ కీలకమైంది. అతడు కేవలం 18 బంతుల్లోనే అర్ధశతకం పూర్తి చేసి టీ twenty అంతర్జాతీయ క్రికెట్లో కొత్త రికార్డు సృష్టించాడు. అతని దూకుడైన బ్యాటింగ్తో భారత్ సులభంగా విజయం అందుకుంది.
మ్యాచ్ అనంతరం మాట్లాడిన సికందర్ రజా పిచ్పై అసంతృప్తి వ్యక్తం చేశాడు. మ్యాచ్ ప్రారంభంలో పిచ్లో తేమ ఎక్కువగా ఉండటంతో కొత్త బంతి బాగా కదిలిందని చెప్పాడు. దీంతో బ్యాటింగ్ చేయడం చాలా కష్టంగా మారిందని వివరించాడు. రజా మాట్లాడుతూ… “ఈ పిచ్ అంతర్జాతీయ స్థాయికి తగిన విధంగా లేదు. ఉదయం తేమ ఉండటం సహజమే. కానీ అది ఇంతసేపు ప్రభావం చూపుతుందని నేను ఊహించలేదు. కొత్త బంతితో చాలా సేపు స్వింగ్, సీమ్ కనిపించింది. అందుకే మా బ్యాటర్లు స్వేచ్ఛగా ఆడలేకపోయారు” అని అన్నాడు. అంతేకాకుండా జింబాబ్వే ఇన్నింగ్స్ ఆరంభంలో బౌండరీలు ఎక్కువగా రాకపోవడంతో బంతి ఎక్కువసేపు కొత్తగానే ఉందని తెలిపాడు. దాని వల్ల బంతి మరింత కదిలి బ్యాటింగ్ చేయడం ఇంకా కష్టమైందని చెప్పాడు.
అయితే భారత్ బ్యాటింగ్కు వచ్చిన సమయానికి పరిస్థితి పూర్తిగా మారిపోయిందని రజా అభిప్రాయపడ్డాడు. అప్పటికే పిచ్ చాలా సులభంగా మారిందని, బంతి నేరుగా బ్యాట్పైకి రావడంతో భారత బ్యాటర్లు ఎలాంటి ఇబ్బంది లేకుండా పరుగులు చేశారని వివరించాడు. ఇటీవల బంగ్లాదేశ్తో జరిగిన వన్డే సిరీస్ను కూడా రజా గుర్తు చేశాడు. ఆ సిరీస్లో కూడా తేమ ఉన్నప్పటికీ అది చాలా ఎక్కువసేపు కొనసాగిందని చెప్పాడు. కానీ ఈ మ్యాచ్లో మాత్రం మొదటి 8 నుంచి 12 ఓవర్ల వరకు మాత్రమే తేమ ప్రభావం కనిపించిందని, ఆ తర్వాత పిచ్ పూర్తిగా బ్యాటింగ్కు అనుకూలంగా మారిపోయిందని అన్నాడు.
తర్వాతి మ్యాచ్లో టాస్ ఓడినా పెద్దగా ప్రభావం చూపని పిచ్ ఉండాలని ఆశిస్తున్నానని కూడా రజా చెప్పాడు. రెండు జట్లకూ సమాన అవకాశాలు ఉండేలా వికెట్ సిద్ధం చేయాలని ఆయన అభిప్రాయపడ్డాడు. ఓటమి వచ్చినా జింబాబ్వే జట్టులో కొన్ని సానుకూల అంశాలు కనిపించాయని రజా తెలిపాడు. జట్టు 32 పరుగులకే 4 వికెట్లు కోల్పోయిన క్లిష్ట పరిస్థితిలో వెస్లీ మధెవెరే, తడియవానాషే మరుమాని కలిసి బాధ్యతాయుతంగా ఆడి జట్టును గౌరవప్రదమైన స్కోరుకు చేర్చారని ప్రశంసించాడు.
వారిద్దరి ఇన్నింగ్స్ వల్లే జట్టు 125 పరుగులు చేయగలిగిందని చెప్పిన రజా, అది తమకు పెద్ద పాజిటివ్ అని పేర్కొన్నాడు. ఇక మిగిలిన బ్యాటర్లు కూడా తర్వాతి మ్యాచ్ల్లో బాధ్యతగా ఆడితే జట్టు మరింత పోటీ ఇవ్వగలదని ఆశాభావం వ్యక్తం చేశాడు. ఇప్పుడు ఈ సిరీస్లో రెండో టీ twenty పై అందరి దృష్టి పడింది.
