ఐర్లాండ్ చేతిలో టీ twenty సిరీస్ను 2-0 తో కోల్పోయిన తర్వాత భారత జట్టుపై విమర్శలు భారీగా పెరిగాయి. ముఖ్యంగా హెడ్ కోచ్ గౌతమ్ గంభీర్ ఇప్పుడు సోషల్ మీడియాలో తీవ్ర విమర్శలను ఎదుర్కొంటున్నారు. ఈ సిరీస్లో భారత్ ఫేవరెట్గా బరిలోకి దిగినా, రెండు మ్యాచ్ల్లోనూ ఓడిపోయి వైట్వాష్కు గురైంది. దీంతో అభిమానులతో పాటు మాజీ క్రికెటర్లు కూడా జట్టు ప్రదర్శనపై ప్రశ్నలు లేవనెత్తుతున్నారు.
కెప్టెన్గా శ్రేయస్ అయ్యర్ను ఎంపిక చేయడం నుంచి, జట్టు ఎంపికలో తీసుకున్న నిర్ణయాల వరకు అన్నింటిపైనా గంభీర్పై విమర్శలు వినిపిస్తున్నాయి. ఈ నేపథ్యంలో ఐస్లాండ్ క్రికెట్ తమ సోషల్ మీడియా ఖాతాలో చేసిన పోస్ట్ వైరల్గా మారింది.
వాళ్లు ఏమన్నారంటే… “గౌతమ్ గంభీర్ను మా కోచింగ్ స్టాఫ్లోకి తీసుకునే ఆలోచన మాకు లేదు. అయితే ఆయనకు టాలెంట్ మాత్రం ఉంది. ఇంత బలమైన భారత జట్టును తీసుకుని ఐర్లాండ్లో ఇలాంటి ఫలితాలు సాధించడం నిజంగా గొప్ప ప్రతిభే” అంటూ వ్యంగ్యంగా కామెంట్ చేశారు. ఈ పోస్ట్ ఇప్పుడు సోషల్ మీడియాలో బాగా ట్రెండ్ అవుతోంది.
ఇక మాజీ భారత క్రికెటర్ సంజయ్ మంజ్రేకర్ కూడా గంభీర్ వ్యూహాలపై తన అభిప్రాయాన్ని వెల్లడించారు. భారత్ జట్టులో ఆల్రౌండర్ల సంఖ్య ఎక్కువైందని, కానీ అసలు అవసరమైన ఒక మంచి మిడిల్ ఆర్డర్ స్పెషలిస్ట్ బ్యాటర్ లేరని అన్నారు.
తన సోషల్ మీడియా పోస్టులో… “ముందు ఆల్రౌండర్లు తక్కువగా ఉండేవారు. ఇప్పుడు మాత్రం ఎక్కువైపోయారు. భారత్కు వెంటనే ఒక ప్యూర్ మిడిల్ ఆర్డర్ బ్యాటర్ అవసరం” అని రాశారు.
అంతేకాదు… మ్యాచ్ తర్వాత జరిగిన చర్చలో కూడా మంజ్రేకర్ భారత బ్యాటింగ్ గురించి మాట్లాడారు. విదేశాల్లో బౌలర్లకు సహకరించే పిచ్లపై భారత బ్యాటర్లు ఇబ్బంది పడుతున్నారని చెప్పారు. మన దేశంలో ఎక్కువగా బ్యాటింగ్కు అనుకూలమైన పిచ్లపైనే ఆడుతున్నారని, అందుకే ఇలాంటి పరిస్థితుల్లో సమస్యలు వస్తున్నాయని అభిప్రాయపడ్డారు.
ఈ సందర్భంగా శుభ్మన్ గిల్ గురించి కూడా ఆయన ప్రత్యేకంగా మాట్లాడారు.శుభ్మన్ లాంటి బ్యాటర్లు జట్టుకు కావాలని ఆయన అన్నారు. ముఖ్యంగా ఇంగ్లాండ్ లాంటి విదేశీ పరిస్థితుల్లో ఎలా ఆడాలో గిల్కు మంచి అనుభవం ఉందని అన్నారు.
“శుభ్మన్ గిల్ లాంటి బ్యాటర్లను మళ్లీ టీ twenty జట్టులోకి తీసుకురావాలి. ఇప్పుడే కాకపోయినా, రాబోయే రోజుల్లో అతనికి అవకాశాలు రావచ్చు. అలాంటి ఆటగాళ్లు కఠినమైన పరిస్థితుల్లో కూడా జట్టుకు ఉపయోగపడతారు” అని మంజ్రేకర్ తెలిపారు.
ఇప్పుడు ఐర్లాండ్ సిరీస్ ముగిసిన తర్వాత భారత జట్టు దృష్టి ఇంగ్లాండ్తో జరిగే టీ twenty సిరీస్పై పడింది. జూలై 1 నుంచి ప్రారంభమయ్యే ఈ సిరీస్లో భారత్ ఎలా పుంజుకుంటుందో చూడాలి. గంభీర్ వ్యూహాల్లో మార్పులు ఉంటాయా? జట్టులో కొత్త మార్పులు కనిపిస్తాయా? అన్నది కూడా ఆసక్తికరంగా మారింది.
మరి ఐర్లాండ్ సిరీస్ ఓటమికి అసలు కారణం ఎవరు అని మీరు భావిస్తున్నారు? గౌతమ్ గంభీర్ వ్యూహాలేనా… లేక ఆటగాళ్ల వైఫల్యమా?
