టీమిండియా స్టార్ వికెట్ కీపర్ బ్యాటర్ రిషభ్ పంత్ త్వరలో జరగబోయే శ్రీలంకతో రెండు మ్యాచ్ల టెస్ట్ సిరీస్ కోసం తన ప్రాక్టీస్ను ప్రారంభించాడు. ఈసారి అతనితో కలిసి భారత మాజీ కెప్టెన్ మహేంద్ర సింగ్ ధోనీ కూడా ట్రైనింగ్ చేయడం ఇప్పుడు సోషల్ మీడియాలో హాట్ టాపిక్గా మారింది. రాంచీలోని ఒక జిమ్లో రిషభ్ పంత్, ధోనీ కలిసి ప్రాక్టీస్ చేస్తున్న ఫోటో బయటకు వచ్చింది. ఈ ఫోటోను భారత మాజీ స్పిన్నర్ షాబాజ్ నదీమ్ సోషల్ మీడియాలో షేర్ చేశాడు. ఆ ఫోటోతో పాటు ఆయన “భారత క్రికెట్లో అత్యుత్తమ ఫినిషర్లలో ఇద్దరు.. రిషభ్ పంత్, ఎంఎస్ ధోనీ” అంటూ క్యాప్షన్ ఇచ్చాడు. దీంతో ఈ ఫోటో క్షణాల్లోనే వైరల్ అయింది.
ఇద్దరు స్టార్ క్రికెటర్లు కలిసి కనిపించడంతో అభిమానులు కూడా ఎంతో ఆనందం వ్యక్తం చేస్తున్నారు. ప్రస్తుతం రిషభ్ పంత్ భారత వన్డే, టీ twenty జట్లలో లేకపోయినా, టెస్ట్ క్రికెట్లో మాత్రం కీలక ఆటగాడిగా కొనసాగుతున్నాడు. శుభ్మన్ గిల్ నాయకత్వంలోని టెస్ట్ జట్టులో పంత్కు చాలా ముఖ్యమైన స్థానం ఉంది. రాబోయే శ్రీలంక టెస్ట్ సిరీస్లో కూడా అతనిపై భారీ అంచనాలు ఉన్నాయి. అయితే ఐపీఎల్ 2026 సీజన్ మాత్రం రిషభ్ పంత్కు ఆశించినంతగా కలిసి రాలేదు. లక్నో సూపర్ జెయింట్స్ జట్టుకు కెప్టెన్గా వ్యవహరించిన పంత్ మొత్తం 312 పరుగులు మాత్రమే చేశాడు.
అతని బ్యాటింగ్ సగటు 28.36 కాగా, స్ట్రైక్ రేట్ 138.05గా నమోదైంది. పంత్ వ్యక్తిగత ప్రదర్శనతో పాటు లక్నో జట్టు కూడా తీవ్రంగా నిరాశపరిచింది. పాయింట్ల పట్టికలో చివరి స్థానంలో నిలిచి టోర్నీని ముగించింది. దీంతో టెస్ట్ క్రికెట్లో మళ్లీ తన సత్తా చాటాలని పంత్ లక్ష్యంగా పెట్టుకున్నాడు. రిషభ్ పంత్ చివరిసారిగా ఈ ఏడాది జూన్లో భారత్, ఆఫ్ఘానిస్తాన్ మధ్య జరిగిన ఏకైక టెస్ట్ మ్యాచ్లో ఆడాడు. ఇప్పుడు శ్రీలంక సిరీస్ కోసం పూర్తిగా సిద్ధమవుతూ తన ఫిట్నెస్పై ప్రత్యేక దృష్టి పెట్టాడు. ఇక భారత జట్టు విషయానికి వస్తే, ప్రస్తుతం వరల్డ్ టెస్ట్ ఛాంపియన్షిప్లో ప్రతి మ్యాచ్ ఎంతో కీలకంగా మారింది.
ఫైనల్ చేరుకోవాలంటే మిగిలిన తొమ్మిది టెస్ట్ మ్యాచ్లలో కనీసం ఏడు మ్యాచ్లు గెలవాల్సిన పరిస్థితి భారత జట్టు ముందుంది. అందుకే స్వదేశంలో జరిగే శ్రీలంక టెస్ట్ సిరీస్ను భారత్ చాలా సీరియస్గా తీసుకుంటోంది. ఈ సిరీస్ను 2-0 తేడాతో గెలిచి పూర్తి ఆధిపత్యం చాటాలని లక్ష్యంగా పెట్టుకుంది. ఎందుకంటే ఈ సిరీస్ తర్వాత భారత జట్టు న్యూజిలాండ్ పర్యటనకు వెళ్లనుంది. అక్కడ టెస్ట్ మ్యాచ్లు ఆడటం ఎప్పుడూ కఠిన సవాలే. కాబట్టి శ్రీలంకపై మంచి విజయంతో ఆ పర్యటనకు వెళ్లాలని టీమిండియా భావిస్తోంది. ఇక మహేంద్ర సింగ్ ధోనీ విషయానికి వస్తే, గాయాల కారణంగా ఆయన ఐపీఎల్ 2026 మొత్తం దూరంగా ఉన్నాడు. దీంతో ధోనీ భవిష్యత్తుపై మరోసారి చర్చ మొదలైంది.
ధోనీ మళ్లీ ఆటగాడిగా వస్తాడా లేక కొత్త బాధ్యతలు చేపడతాడా అనే సందేహాలు అభిమానుల్లో ఉన్నాయి. ఇదే సమయంలో చెన్నై సూపర్ కింగ్స్ జట్టులో ధోనీకి కీలక బాధ్యతలు ఇవ్వాలని యాజమాన్యం ఆలోచిస్తున్నట్లు వార్తలు వస్తున్నాయి. స్టీఫెన్ ఫ్లెమింగ్ హెడ్ కోచ్ పదవి నుంచి తప్పుకున్న తర్వాత ధోనీని మెంటర్గా నియమించే అవకాశం ఉందని సమాచారం. అంతేకాదు, జట్టు క్రికెట్ కార్యకలాపాలపై పూర్తి బాధ్యత కూడా ఆయనకు అప్పగించే అవకాశాలు ఉన్నాయని ప్రచారం జరుగుతోంది. 2023లో ఐపీఎల్ టైటిల్ గెలిచిన తర్వాత వరుసగా మూడు సీజన్లలో చెన్నై సూపర్ కింగ్స్ ప్లే ఆఫ్స్కు చేరుకోలేకపోయింది.
దీంతో జట్టులో పెద్ద మార్పులు చేయాలని యాజమాన్యం భావిస్తోంది. ఆ మార్పుల్లో భాగంగా ధోనీకి కీలక బాధ్యతలు అప్పగించే అవకాశం ఉందని వార్తలు వినిపిస్తున్నాయి. మరి శ్రీలంక టెస్ట్ సిరీస్లో రిషభ్ పంత్ ఎలా రాణిస్తాడు? ధోనీతో చేసిన ఈ ప్రాక్టీస్ అతనికి ఎంతవరకు ఉపయోగపడుతుందో చూడాలి.
